ശംഖുംമുഖം: ലാന്ഡിംഗിനിടെ പക്ഷിയിടിച്ചിട്ടും നിയന്ത്രണം തെറ്റാതെ വിമാനം സുരക്ഷിതമായി ഇറക്കി പൈലറ്റ്. വ്യാഴാഴ്ച പുലര്ച്ചെ കുവൈറ്റില് നിന്ന് തിരുവനന്തപുരം വിമാനത്താവളത്തിലെത്തിയ കുവൈറ്റ് എയര്വേയ്സ് വിമാനം റണ്വേയില് പറന്നിറങ്ങാന് തുടങ്ങുന്നതിനിടെയാണ് പക്ഷി വിമാനത്തിന് നേരെയെത്തിയത്.
പിന്നിട് സെക്കന്ഡുകള്ക്കുള്ളില് പൈലറ്റിന്റെ സമയോചിത ഇടപെടലും നിയന്ത്രണവും കാരണം വിമാനം സുരക്ഷിതമായി റണ്വേയില് ലാന്ഡിംഗ് നടത്തി. അതീവ ഗുരുതരമായ സംഭവമായതിനാല് പൈലറ്റ് ഉടന്തന്നെ പക്ഷിയിടി റിപ്പോര്ട്ട് ചെയ്തു. റിപ്പോര്ട്ടിന്റെ അടിസ്ഥാനത്തില് ഡയറക്ടര് ഓഫ് സിവില് ഏവിയേഷന്റെ ഭാഗത്തുനിന്ന് ഉടന് അന്വേഷണമുണ്ടാകും.
