തൊടുപുഴ: കാഞ്ഞിരപ്പള്ളിയിൽ വഴിയരികിലെ പഴക്കടയിൽ നിന്ന് മാങ്ങാ മോഷ്ടിച്ച പൊലീസ് ഉദ്യോഗസ്ഥനെ ജോലിയിൽ നിന്ന് പിരിച്ചുവിടാൻ തീരുമാനം. ഇടുക്കി എആർ ക്യാമ്പിലെ സിവിൽ പൊലീസ് ഓഫീസർ പിവി ഷിഹാബിനെതിരെയാണ് നടപടി.കേസുമായി ബന്ധപ്പെട്ട കാരണം കാണിക്കൽ നോട്ടീസ് ഇടുക്കി എസ്പി വി.യു കുര്യോക്കോസ് പൊലീസുകാരന് കൈമാറി. 2022 സെപ്റ്റംബർ 30ന് നടന്ന സംഭവത്തിൽ മുണ്ടക്കയം സ്വദേശി ഷിഹാബിനെതിരെ പൊലീസ് കേസെടുത്തിരുന്നു. കോട്ടയം മെഡിക്കൽ കോളേജിലെ ഡ്യൂട്ടി കഴിഞ്ഞ് മടങ്ങവെ പുലർച്ചെയായിരുന്നു മോഷണം. 600 രൂപ വില വരുന്ന 10 കിലോ മാമ്പഴം ആണ് മോഷ്ടിച്ചത്. ഉടമ രാവിലെ കടതുറക്കാൻ എത്തിയപ്പോഴാണ് മോഷണ വിവരം അറിഞ്ഞത്. തുടർന്ന് പൊലീസിൽ പരാതി നൽകുകയായിരുന്നു.കടയുടെ സമീപത്തെ സിസിടിവി ദൃശ്യങ്ങളിൽ വാഹനത്തിൻ്റെ നമ്പർ ഉൾപ്പടെ വ്യക്തമായിരുന്നതാണ് പൊലീസുകാരനെ കണ്ടെത്താൻ സഹായിച്ചത്.
