തൃശൂർ: ഗുരുവായൂർ മമ്മിയൂരില്‍ ആംബുലൻസ് ഓട്ടോറിക്ഷയിലിടിച്ച്‌ ഒരു കുടുംബത്തിലെ ആറ് പേർക്ക് പരുക്കേറ്റു. ഓട്ടോറിക്ഷയിലുണ്ടായിരുന്ന കേച്ചേരി സ്വദേശി തെരുവത്ത് ഷക്കീർ (56), ഭാര്യ ഷംല (41), മക്കളായ ഫിർദൗസ് (15), അഫ്‌ല (13), തസ്ലീമ (12), മുബാറക്ക് (10) എന്നിവർക്കാണ് പരുക്കേറ്റത്.
മമ്മിയൂർ പെട്രോള്‍ പമ്പിpന് സമീപം ശനിയാഴ്ച രാത്രി എട്ടരയോടെയാണ് അപകടം. മുതുവട്ടൂർ രാജ ആശുപത്രിയില്‍നിന്ന് രോഗിയെ എടുക്കാനായി പോയിരുന്ന കോട്ടപ്പടി ലൈഫ് കെയറിന്റെ ആംബുലൻസ് ചാവക്കാട് ഭാഗത്തുനിന്ന് വരികയായിരുന്ന ഓട്ടോറിക്ഷയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ഓട്ടോറിക്ഷ മറിഞ്ഞ് സമീപത്തെ മതില്‍ തകർന്നു.
പ്രവാസി വ്യവസായി പേനത്ത് ഷാജിയുടെ മതിലാണ് തകർന്നത്. പരുക്കേറ്റവരെ അമല ആശുപത്രിയില്‍ പ്രവേശിപ്പിച്ചു. ഗുരുതരമായി പരുക്കേറ്റ അഫ്‌ലയെ ആലുവയിലെ സ്വകാര്യ ആശുപത്രിയിലേക്ക് മാറ്റി. ആംബുലൻസ് ഡ്രൈവർ പരുക്കേല്‍ക്കാതെ രക്ഷപ്പെട്ടു.
