തദ്ദേശ തെരഞ്ഞെടുപ്പിന് വേണ്ട പണം പ്രാദേശികമായി കണ്ടെത്തേണ്ടി വരുമെന്നാണ് കോണ്‍ഗ്രസ് നേതൃത്വത്തിന്റെ വിലയിരുത്തല്‍. വാര്‍ഡൊന്നിന് 60,000 രൂപ പിരിച്ചെടുക്കാനാണ് ലക്ഷ്യമിടുന്നത്. മണ്ഡലം പ്രസിഡന്റും വാര്‍ഡ് പ്രസിഡന്റും ചേര്‍ന്ന് ആരംഭിക്കുന്ന സംയുക്ത അക്കൗണ്ടിലാണ് തുക സൂക്ഷിക്കേണ്ടത്. ഇതില്‍ 10 ശതമാനം ഡിസിസിക്ക് നല്‍കണം. ബാക്കിത്തുക തദ്ദേശ തെരഞ്ഞെടുപ്പ് ആവശ്യങ്ങള്‍ക്ക് പ്രാദേശികാടിസ്ഥാനത്തില്‍ ചെലവഴിക്കാം. മേല്‍ക്കമ്മിറ്റികളെ അറിയിച്ചുമാത്രമേ പണം പിന്‍വലിക്കാന്‍ കഴിയൂ. പണം സംഭരിക്കുന്നതിനുള്ള കൂപ്പണും വീടുകളില്‍ നല്‍കുന്നതിനുള്ള അഭ്യര്‍ത്ഥനയും വാള്‍പോസ്റ്ററുകളും കെപിസിസിയാണ് നല്‍കുന്നത്.
തെരഞ്ഞെടുപ്പ് ലക്ഷ്യമിട്ടുകൊണ്ട് ഫണ്ട് പിരിവിന് തയാറെടുക്കുകയാണ് കോണ്‍ഗ്രസ്. ഓഗസ്റ്റ് 29, 30, 31 തീയതികളിലായി വാര്‍ഡ് തലത്തില്‍ ജനങ്ങളില്‍ നിന്ന് പിരിവ് നടത്തും. പഞ്ചായത്ത് തെരഞ്ഞെടുപ്പൊരുക്കങ്ങളുടെ ഭാഗമായി കെപിസിസി പ്രസിഡന്റ് മുതല്‍ ബൂത്ത് കമ്മിറ്റി പ്രസിഡന്റുമാര്‍ വരെയുള്ള കോണ്‍ഗ്രസ് നേതാക്കള്‍ വ്യാഴാഴ്ച മുതല്‍ നാലുദിവസം സംസ്ഥാനത്ത് വീടുകള്‍ കയറിയിറങ്ങും. ഓരോ നേതാവും അവരവരുടെ വാര്‍ഡുകളിലെ മുഴുവന്‍ വീടുകളും സന്ദര്‍ശിക്കണമെന്നാണ് പാര്‍ട്ടി നല്‍കിയിട്ടുള്ള കര്‍ശന നിര്‍ദേശം. ഗൃഹസന്ദര്‍ശന പരിപാടിയില്‍ സഹകരിക്കാതെയും പങ്കെടുക്കാതെയും മാറിനില്‍ക്കുന്ന നേതാക്കളുടെയും പ്രധാന പ്രവര്‍ത്തകരുടെയും വിവരങ്ങള്‍ ശേഖരിക്കുന്നതിനുള്ള സംവിധാനവും പാര്‍ട്ടിനേതൃത്വം ഒരുക്കിയിട്ടുണ്ട്.
