കാസർകോട് കുണ്ടംകുഴി ഗവ.ഹയർ സെക്കൻഡറി സ്കൂളിലെ പത്താം ക്ലാസ് വിദ്യാർഥിക്കാണ് ഗുരുതരമായി പരിക്ക് പറ്റിയത്. മറ്റ് വിദ്യാർഥികള്‍ക്കൊപ്പം അസംബ്ലിയില്‍ അണിനിരന്നിരുന്ന കുട്ടിയുടെ മുഖത്ത് പ്രധാനാധ്യാപകൻ അടിക്കുകയും, തുടർന്ന് കോളറില്‍ പിടിച്ച് വലതു ഭാഗത്തെ ചെവി പിടിച്ചുയർത്തി കർണപടം തകർക്കുകയുമായിരുന്നുവെന്ന് മാതാപിതാക്കള്‍ ആരോപിക്കുന്നു. ചെവിയില്‍ അനുഭവപ്പെട്ട അസഹ്യമായ വേദനയെത്തുടർന്നാണ് കുട്ടിയെ ആദ്യം ബേഡകം താലൂക്ക് ആശുപത്രിയില്‍ പ്രവേശിപ്പിച്ചത്. അവിടെനിന്ന് വിദഗ്ധ ചികിത്സ നിർദ്ദേശിച്ചതിനെത്തുടർന്ന് കാസർകോട് സ്വകാര്യ ആശുപത്രിയിലെ ഇഎൻടി വിഭാഗത്തില്‍ പ്രവേശിപ്പിച്ച്‌ വിശദമായ പരിശോധനകള്‍ നടത്തി.
പരിശോധനയില്‍ കുട്ടിയുടെ വലതു ചെവിക്ക് കേള്‍വിശക്തി കുറവുണ്ടെന്നും കർണപടം പൊട്ടിയിട്ടുണ്ടെന്നും കണ്ടെത്തുകയായിരുന്നു. ഈ അവസ്ഥയില്‍ കുട്ടിയെ അടിയന്തര ശസ്ത്രക്രിയയ്ക്ക് വിധേയനാക്കേണ്ടി വരുമെന്ന് ഡോക്ടർമാർ അറിയിച്ചിട്ടുണ്ട്.
സംഭവത്തില്‍ കുറ്റക്കാരായ പ്രധാനാധ്യാപകൻ എം.അശോകനെതിരെ പരാതി നല്‍കാനുള്ള തയ്യാറെടുപ്പിലാണ് കുട്ടിയുടെ മാതാപിതാക്കള്‍. തൻ്റെ മകനെ മർദിച്ച ദിവസം പിടിഎ കമ്മിറ്റി അംഗങ്ങളോടൊപ്പം പ്രധാനാധ്യാപകൻ വീട്ടിലെത്തിയിരുന്നെന്നും, അന്ന് തെറ്റു പറ്റിയതായി സമ്മതിച്ചതായും മാതാപിതാക്കള്‍ വെളിപ്പെടുത്തി.
പരിശോധനാ ഫലങ്ങള്‍ ലഭിച്ച ശേഷം ഔദ്യോഗികമായി പരാതി നല്‍കാനാണ് അവർ തീരുമാനിച്ചിരിക്കുന്നത്. നാളെ രാവിലെ ചൈല്‍ഡ് ലൈനില്‍ സംഭവത്തെക്കുറിച്ച്‌ പരാതി നല്‍കുമെന്ന് മാതാപിതാക്കള്‍ അറിയിച്ചു. സംഭവം വിദ്യാഭ്യാസ വകുപ്പില്‍ തന്നെ വലിയ ചർച്ചകള്‍ക്ക് വഴിവെച്ചിട്ടുണ്ട്.
