സംസ്ഥാന വ്യാപകമായി എൻഐഎ നടത്തിയ റെയ്ഡിനിടെ അറസ്റ്റ് ചെയ്ത മുഹമ്മദ് മുബാറഖിൻ്റെ ചോദ്യം ചെയ്യൽ ഇന്ന് ആരംഭിക്കും. കൊച്ചി എൻഐഎ ആസ്ഥാനത്താണ് ചോദ്യം ചെയ്യൽ നടക്കുക. കഴിഞ്ഞദിവസം എൻഐഎ പ്രത്യേക കോടതി അഞ്ച് ദിവസത്തെ കസ്റ്റഡി അനുവദിച്ചിരുന്നു. പോപ്പുലർ ഫ്രണ്ട് ഹിറ്റ് സ്ക്വാഡ് അംഗമാണ് മുഹമ്മദ് മുബാറഖ് എന്നാണ് എൻഐഎയുടെ കണ്ടെത്തൽ. മറ്റു പാർട്ടികളിലെ നേതാക്കളെ വധിക്കാൻ ലക്ഷ്യമിട്ട് ഇയാൾ പോപ്പുലർ ഫ്രണ്ട് പ്രവർത്തകർക്ക് പരിശീലനം നൽകിയതായും ഏജൻസി വ്യക്തമാക്കുന്നു. എൻഐഎ നടത്തിയ റെയ്ഡിൽ ഇയാളുടെ വീട്ടിൽ നിന്ന് മഴുവും വാളും ഉൾപ്പെടെയുള്ള ആയുധങ്ങൾ കണ്ടെത്തിയിരുന്നു.
