എടിഎം തട്ടിപ്പുകളുടെ എണ്ണത്തിലും വലിയ കുറവൊന്നുമില്ല. അതിനാല്‍ത്തന്നെ എടിഎം പിൻ നമ്പറും കാർഡും സുരക്ഷിതമായി സൂക്ഷിക്കേണ്ടത് ഉടമയുടെ ഉത്തരവാദിത്തമാണ്.
എടിഎം ഉപയോഗിക്കുമ്പോൾ എന്തെങ്കിലും തെറ്റോ അബദ്ധമോ സംഭവിച്ചാല്‍ ഉപയോക്താവിന് പണം ലഭിച്ചെന്നു വരില്ല. എടിഎം ഉപയോഗിക്കുന്നവരില്‍ ഭൂരിഭാഗവും ഒരു തെറ്റ് ചെയ്യാറുണ്ട്. എടിഎം ഉപയോഗിച്ചതിനുശേഷം മെഷീനിലുളള ക്യാൻസല്‍ എന്ന ബട്ടണ്‍ രണ്ടു തവണയോ അതില്‍ കൂടുതലോ അമർത്താറുണ്ട്. കൂടുതല്‍ സുരക്ഷയ്ക്കുവേണ്ടിയാണ് പലരും ഈ അബദ്ധം ചെയ്യുന്നത്.
കുറച്ചു ദിവസങ്ങള്‍ക്ക് മുൻപ് ഇതുമായി ബന്ധപ്പെട്ട ചില കാര്യങ്ങള്‍ സോഷ്യല്‍ മീഡിയയില്‍ ചർച്ചാ വിഷയമായി മാറിയിരുന്നു. എടിഎം ഉപയോഗിച്ചുകഴിഞ്ഞ് രണ്ട് തവണ ക്യാൻസർ ബട്ടണ്‍ അമർത്തിയാല്‍ തട്ടിപ്പുകളില്‍ നിന്ന് രക്ഷപ്പെടാമെന്നായിരുന്നു സന്ദേശം. എന്നാല്‍ റിസർവ് ബാങ്ക് ഒഫ് ഇന്ത്യ ഈ സന്ദേശത്തില്‍ ചില വ്യക്ത വരുത്തിയിട്ടുണ്ട്. പ്രസ് ഇൻഫർമേഷൻ ബ്യൂറോ (പിഐബി) പറയുന്നതനുസരിച്ച്‌ ആർബിഐ ഇത്തരത്തിലുളള നിർദ്ദേശങ്ങള്‍ പുറപ്പെടുവിച്ചിട്ടില്ലെന്നാണ്.
പണമിടപാടുകള്‍ നിർത്തുന്നതിനുവേണ്ടിയാണ് എടിഎം മെഷീനിലെ ക്യാൻസല്‍ ബട്ടണ്‍ ഘടിപ്പിച്ചിരിക്കുന്നത്. അല്ലാതെ കാർഡിന്റെ വിവരങ്ങള്‍ ചോർത്തിയെടുക്കുക, ഹാക്കിംഗ് മുതലായവ തടയാൻ ക്യാൻസർ ബട്ടണ്‍ രണ്ടുതവണ അമർത്തുന്നത് സഹായിക്കില്ല. ഇത്തരത്തിലുളള വ്യാജപ്രചാരണങ്ങള്‍ ഉപയോക്തക്കളെ ആശയക്കുഴപ്പത്തിലാക്കിയിരിക്കുകയാണെന്ന് ആർബിഐ പ്രതികരിച്ചു. കാർഡ് സ്‌കിമ്മിംഗ്,ഫിഷിംഗ്,കീപാഡ് ടാംപെറിംഗ് തുടങ്ങിയവയാണ് പ്രധാന എടിഎം തട്ടിപ്പുകള്‍. നിങ്ങളുടെ എടിഎം കാർഡ്, പിൻ നമ്പർ എന്നിവ സുരക്ഷിതമായി സൂക്ഷിച്ചാല്‍ ഈ തട്ടിപ്പുകളില്‍ നിന്ന് ഒരുപരിധി വരെ രക്ഷപ്പെടാൻ സാധിക്കും,
മറ്റ് നിർദ്ദേശങ്ങൾ
1. ആറ് മാസം കൂടുമ്പോൾ എടിഎമ്മിന്റെ പിൻ നമ്പർ മാറ്റുക. നിങ്ങള്‍ ജനിച്ച വർഷം, 1234,1111 എന്നീ നമ്പരുകൾ പിൻ നമ്പരായി തിരഞ്ഞെടുക്കാതിരിക്കുക.
2. എടിഎമ്മില്‍ നിങ്ങളെ സമീപിക്കുന്ന അപരിചിതരെ സഹായിക്കാതിരിക്കുക. അവരോട് അടുത്തുളള ബാങ്കുമായി ബന്ധപ്പെടാൻ നിർദ്ദേശിക്കുക.
3. നിങ്ങളുടെ എടിഎം കാർഡ് നഷ്ടപ്പെട്ടാല്‍ ഉടൻ തന്നെ ബ്ലോക്ക് ചെയ്യാനുളള നടപടികള്‍ സ്വീകരിക്കുക.
4. എടിഎം പണമിടപാടുമായി ബന്ധപ്പെട്ട് നിങ്ങള്‍ക്ക് വരുന്ന എസ്‌എംഎസുകള്‍ ഇമെയിലുകള്‍ എന്നിവ നിരീക്ഷിക്കുക.
