ഗ്രാമി വേദിയിൽ ചരിത്രമെഴുതി ഗായിക ബിയോൺസെ. നാല് ഗ്രാമി പുരസ്കാരങ്ങൾ നേടി ഏറ്റവും കൂടുതൽ ഗ്രാമി അവാർഡ് നേടുന്ന താരമായി ചരിത്രം കുറിച്ചിരിക്കുകയാണ് ബിയോൺസെ. മികച്ച ഡാൻസ് ഇലക്ട്രോണിക് മ്യൂസിക്ക് ആൽബം വിഭാഗത്തിലാണ് ബിയോൺസിന് പുരസ്കാരം ലഭിച്ചത്. "റിനൈസൻസ്" എന്ന ആൽബമാണ് പുരസ്കാരത്തിന് അർഹമായത്. വേദിയിൽ ബിയോൺസെ വികാരനിർഭരയായി കാണപ്പെട്ടു. പുരസ്കാരം സ്വീകരിച്ചുകൊണ്ട് ബിയോൺസെ പറഞ്ഞതിങ്ങനെ – "ഞാൻ അധികം വികാരനിർഭരയാകാതിരിക്കാൻ ശ്രമിക്കുകയാണ്. എന്നെ സംരക്ഷിക്കുന്നതിന് ദൈവത്തിന് നന്ദി. എൻ്റെ അങ്കിൾ ജോണിക്ക് ഞാൻ ഈ അവസരത്തിൽ നന്ദി പറയുന്നു. അദ്ദേഹം ഇന്ന് ഇവിടെ ഇല്ല, പക്ഷേ അദ്ദേഹത്തിൻ്റെ ആത്മാവ് ഇവിടെ തന്നെയുണ്ട്. എന്നെ സ്നേഹിക്കുകയും മുന്നോട്ട് തള്ളിവിടുകയും ചെയ്ത എൻ്റെ അമ്മയ്ക്കും അച്ഛനും നന്ദി. വീട്ടിലിരുന്ന് ഇത് കാണുന്ന എൻ്റെ ഭർത്താവിനും മൂന്ന് മക്കൾക്കും നന്ദി. ക്വീർ കമ്യൂണിറ്റിക്കും ഞാൻ എൻ്റെ നന്ദി രേഖപ്പെടുത്തുന്നു. ദൈവം നിങ്ങളെ അനുഗ്രഹിക്കട്ടെ. ഗ്രാമിക്ക് വളരെയധികം നന്ദി".
