നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഡാലോചന നടത്തിയെന്ന കേസില് ആണ് ഇവരെ ഇപ്പോള് ചോദ്യം ചെയ്തത്
പ്രതികളെ ചോദ്യം ചെയ്തത് അഞ്ച് സംഘങ്ങളായി തിരിഞ്ഞാണ്. മണിക്കൂറുകളോളം ഇവരെ അന്വേഷണസംഘം ചോദ്യം ചെയ്തു. ഇവരെ ഒന്നിച്ചിരുത്തി മൊഴികള് പരിശോധിച്ചശേഷം ചോദ്യം ചെയ്യാന് തീരുമാനിച്ചെന്ന് പോലീസ് അറിയിച്ചു. അന്വേഷണ സംഘം പ്രതികള് നല്കിയ മൊഴികളും കേസില് കണ്ടെത്തിയ തെളിവുകളും തമ്മില് പരിശോധിക്കുകയാണ്. മൊഴികള് പരിശോധിക്കുന്നത് എസ്പി മോഹനചന്ദ്രനാണ്.
ചോദ്യം ചെയ്യലില് ദിലീപ് നല്കിയ മൊഴികളില് നിറയെ പൊരുത്തക്കേടുകളുണ്ടെന്ന് ക്രൈംബ്രാഞ്ച് വൃത്തങ്ങള് അറിയിച്ചു. തെളിവുകളുള്ള കാര്യങ്ങളില് പോലും നിഷേധാത്മക മറുപടിയാണ് ദിലീപ് നല്കുന്നത്.
ബിഷപുമായി ബന്ധപ്പെട്ട് ഉയര്ന്ന വാദങ്ങളെയും ക്രൈംബ്രാഞ്ച് തള്ളിയിട്ടുണ്ട്. അന്വേഷണം വഴിതിരിച്ചുവിടാനുള്ള നീക്കത്തിന്റെ ഭാഗമാണിതെന്നും ആരോപണത്തില് കഴമ്പൊന്നുമില്ലെന്നും അന്വേഷണസംഘം നിരീക്ഷിച്ചു.
മൊഴികള് വിശദമായി വിലയിരുത്തിയ ശേഷം ബാക്കി കാര്യങ്ങള് തീരുമാനിക്കൂമെന്ന് എഡിജിപി എസ്. ശ്രീജിത്ത് മാധ്യമങ്ങളോട് പറഞ്ഞു. അന്വേഷണ ഉദ്യോഗസ്ഥരെ അപായപ്പെടുത്താന് ശ്രമിച്ചതിന് ആവശ്യത്തിന് തെളിവ് പോലീസിന്റെ കൈവശമുണ്ടെന്നും ശ്രീജിത്ത് പറഞ്ഞു.
കോടതിയില് മുന്കൂര് ജാമ്യത്തിന് ശ്രമിച്ചവരെയാണ് ഇപ്പോള് ചോദ്യം ചെയ്യുന്നത്. ആവശ്യമെങ്കില് കൂടുതല് ആളുകളെയും ചോദ്യം ചെയ്യും. കേസില് സത്യം പുറത്ത് കൊണ്ടുവരാന് കഴിയുമെന്ന് ആത്മവിശ്വാസമുണ്ടെന്നും ശ്രീജിത്ത് അറിയിച്ചു.
കളമശേരി ക്രൈംബ്രാഞ്ച് ഓഫീസില് വെച്ചാണ് ചോദ്യംചെയ്യല് നടക്കുന്നത്. ദിലീപിന്റെ സഹോദരൻ അനൂപ്, സഹോദരി ഭർത്താവ് സൂരജ്, ബന്ധു അപ്പു, സുഹൃത്ത് ബൈജു ചെങ്ങമനാട് എന്നിവരെയും ചോദ്യം ചെയ്യുന്നുണ്ട്. ചോദ്യം ചെയ്യല് മുഴുവൻ വീഡിയോ ക്യാമറയിൽ ചിത്രീകരിക്കും.
അതേസമയം, നടിയെ ആക്രമിച്ച കേസിന്റെ വിചാരണ വേഗത്തില് പൂര്ത്തിയാക്കണമെന്ന് ആവശ്യപ്പെട്ട് ദിലീപ് സുപ്രീംകോടതിയെ സമീപിച്ചു. വിചാരണ പൂര്ത്തിയാക്കാന് സമയം വേണമെന്ന് ആവശ്യപ്പെട്ട് സര്ക്കാര് സുപ്രീംകോടതിയെ സമീപിച്ച സാഹചര്യത്തിലാണ് ദിലീപും ഹര്ജി നല്കിയത്.