തിരുവനന്തപുരം: ഭക്ഷ്യ സുരക്ഷാ വകുപ്പിന്റെ നേതൃത്വത്തില് സംസ്ഥാന വ്യാപകമായി ഷവർമ്മ വ്യാപാര സ്ഥാപനങ്ങളില് പരിശോധന നടത്തിയതായി ആരോഗ്യ വകുപ്പ് മന്ത്രി വീണാ ജോർജ്.
43 സ്ക്വാഡുകളുടെ നേതൃത്വത്തില് 502 വ്യാപാര കേന്ദ്രങ്ങളിലാണ് പരിശോധന പൂർത്തിയാക്കിയത്. കൃത്യമായ മാനദണ്ഡങ്ങള് പാലിക്കാതെ പ്രവർത്തനം നടത്തിയ 54 സ്ഥാപനങ്ങളിലെ ഷവർമ്മയുടെ നിർമ്മാണവും വില്പ്പനയും നിർത്തിവയ്പ്പിച്ചു.
88 സ്ഥാപനങ്ങള്ക്ക് കോമ്പൗണ്ടിംഗ് നോട്ടീസും 61 സ്ഥാപനങ്ങള്ക്ക് റെക്ടിഫിക്കേഷൻ നോട്ടീസും നല്കി. ഇതുകൂടാതെ വേനല്ക്കാലം മുൻനിർത്തിയുള്ള പ്രത്യേക പരിശോധനകള് നടന്നു വരുന്നതായും മന്ത്രി വ്യക്തമാക്കി.
വൃത്തിഹീനമായ അന്തരീക്ഷത്തില് ഷവർമ്മ നിർമ്മാണം നടക്കുന്നുവെന്ന പരാതിയെ തുടർന്നായിരുന്നു പരിശോധന. ഷവർമ്മ നിർമ്മാണവും വില്പനയും നടത്തുന്ന സ്ഥാപനങ്ങള് ഭക്ഷ്യ സുരക്ഷാ വകുപ്പിന്റെ മാനദണ്ഡങ്ങള് കൃത്യമായി പാലിക്കേണ്ടതാണ്. ഷവർമ്മ നിർമ്മിക്കുന്നവർ ശാസ്ത്രീയമായ ഷവർമ്മ പാചക രീതിയെക്കുറിച്ച് അറിഞ്ഞിരിക്കേണ്ടതും വകുപ്പിന്റെ ബോധവത്കരണ ക്ലാസുകളില് പങ്കെടുത്ത് മാർഗ നിർദേശങ്ങള് സ്വന്തം സ്ഥാപനങ്ങളില് നടപ്പില് വരുത്തേണ്ടതുമാണ്.
പ്രാഥമികഘട്ട ഉത്പാദന സ്ഥലം മുതല് ഉപയോഗിക്കുന്ന സ്റ്റാന്റ്, ടേബിള് എന്നിവ പൊടിയും അഴുക്കും ആകുന്ന രീതിയില് തുറന്ന് വെക്കാതെ വൃത്തിയുള്ളതായിരിക്കണം. ഷവർമ്മ സ്റ്റാന്റില് കോണില് നിന്നുള്ള ഡ്രിപ് കളക്ട് ചെയ്യാനുള്ള ട്രേ സജ്ജീകരിച്ചിട്ടുള്ളതായിരിക്കണം.