എറണാകുളം: ചെങ്കോട്ട- പുനലൂർ പാതയിലൂടെ ശബരിമല സ്പെഷൽ ട്രെയിൻ പ്രഖ്യാപിച്ചു. കൊല്ലം- ചെങ്കോട്ട പാതയിലൂടെ കേരളത്തിനു ലഭിക്കുന്ന ആദ്യ ശബരിമല സ്പെഷൽ ട്രെയിനാണിത്.
ശബരിമല സ്പെഷൽ (06067) കൊല്ലം, ചെങ്കോട്ട വഴി എറണാകുളം - ചെന്നൈ താംബരം നവംബർ 28 മുതൽ 2023 ജനുവരി 2 വരെ സർവീസ് നടത്തും.
എറണാകുളത്തു നിന്നു തിങ്കളാഴ്ച ഉച്ചയ്ക്ക് 1.10ന് പുറപ്പെടുന്ന ട്രെയിൻ ചൊവ്വാഴ്ച ഉച്ചയ്ക്ക് 12ന് താംബരത്ത് എത്തും. കൊല്ലം- ചെങ്കോട്ട പാതയിലൂടെ കേരളത്തിനു ലഭിക്കുന്ന ആദ്യ ശബരിമല സ്പെഷൽ ട്രെയിനാണിത്.
മടക്ക ട്രെയിൻ (06068) ചൊവ്വാഴ്ച ഉച്ചതിരിഞ്ഞ് 3.40ന് താംബരത്തു നിന്നു പുറപ്പെട്ട് ബുധനാഴ്ച ഉച്ചയ്ക്ക് 12ന് എറണാകുളത്ത് എത്തും.
കോട്ടയം, ചങ്ങനാശേരി, തിരുവല്ല, ചെങ്ങന്നൂർ, മാവേലിക്കര, കായംകുളം, കരുനാഗപ്പള്ളി, ശാസ്താംകോട്ട, കൊല്ലം, കുണ്ടറ, കൊട്ടാരക്കര, ആവണീശ്വരം, പുനലൂർ, തെന്മല എന്നിവയാണ് കേരളത്തിലെ സ്റ്റോപ്പുകൾ. ചെങ്കോട്ട, രാജപാളയം, ശിവകാശി, മധുര, ഡിണ്ടിഗൽ, തിരുച്ചിറപ്പള്ളി, തഞ്ചാവൂർ, കുംഭകോണം, ചിദംബരം, വില്ലുപുരം എന്നിവയാണ് തമിഴ്നാട്ടിലെ പ്രധാന സ്റ്റോപ്പുകൾ.
ചെന്നൈയിൽ നിന്നുള്ള ട്രെയിൻ ബുധനാഴ്ചകളിൽ രാവിലെ 6.50ന് പുനലൂരിലെത്തും. തീർത്ഥാടകർക്ക് പുനലൂരിൽ നിന്ന് പമ്പയിലേക്ക് കെഎസ്ആർടിസി ബസ് സൗകര്യവും ലഭിക്കുന്നതാണ്.