മൂന്നാർ: മൂന്നാറിൽ വീണ്ടും താപനില പൂജ്യം ഡിഗ്രി സെൽഷ്യസിന് താഴെയെത്തി. സൈലൻ്റ് വാലി, ചെണ്ടുവര, കന്നിമല, ഒ ഡി കെ, ചൊക്കനാട്, ലാക്കാട് സിമൻ്റ് പാലം എന്നിവിടങ്ങളിലാണ് താപനില മൈനസ് ഒരു ഡിഗ്രി സെൽഷ്യസ് രേഖപ്പെടുത്തിയത്. വെള്ളിയാഴ്ച രാത്രിയോടെയാണ് താപനില മൈനസ് ഒന്നിലെത്തിയത്. ഈ സീസണിൽ ഇത് നാലാം തവണയാണ് മൂന്നാർമേഖലയിൽ താപനില പൂജ്യത്തിനും താഴെയെത്തുന്നത്. മൂന്നാർ മേഖലയിൽ ഡിസംബർ ആദ്യവാരം മുതൽ അതിശൈത്യമാണ്. ഡിസംബർ മുതൽ മൂന്നുതവണ മഞ്ഞുവീഴ്ചയുണ്ടായി. ജനുവരി 18നാണ് അവസാനമായി മഞ്ഞുവീണത്. വെള്ളിയാഴ്ച രാത്രി താപനില പെട്ടെന്ന് കുറഞ്ഞ് പൂജ്യത്തിനു താഴെ എത്തുകയായിരുന്നു.
