ട്വിറ്റർ സിഇഒ സ്ഥാനം രാജിവെക്കുമെന്ന് പ്രഖ്യാപിച്ച് ഇലോൺ മസ്ക്. ഇന്ന് പുലർച്ചെ ട്വിറ്ററിലൂടെയാണ് മസ്ക് ഈ കാര്യം വ്യക്തമാക്കിയത്. 'ട്വിറ്റർ സിഇഒ സ്ഥാനം ഏറ്റെടുക്കാൻ തക്ക വിഡ്ഢിയായ ഒരാളെ കണ്ടെത്തിയാൽ ഉടൻ രാജിവയ്ക്കും. അതിനുശേഷം സോഫ്റ്റ്‌വെയർ സെർവർ ടീമിൻറെ പ്രവർത്തനത്തിന് മാത്രം നേതൃത്വം നൽകും'- ഇലോൺ മസ്കിന്റെ ട്വീറ്റ് ഇങ്ങനെ. നേരത്തെ താൻ ട്വിറ്റർ മേധാവിസ്ഥാനം ഒഴിയണോ എന്ന ട്വിറ്റർ പോളിൽ പരാജയപ്പെട്ടതിനെ തുടർന്ന് കമ്പനിക്കായി മറ്റൊരു സിഇഒയെ ഇലോൺ മസ്ക് തിരഞ്ഞു തുടങ്ങിയതായി റിപ്പോർട്ടുകൾ പുറത്തുവന്നിരുന്നു. ഇതിന് പിന്നാലെയാണ് ട്വിറ്ററിലൂടെയുള്ള രാജി പ്രഖ്യാപനം. ട്വിറ്ററിൽ തന്നെ നൽകിയിരുന്ന പോളിലാണ് മസ്കിന്റെ പുതിയ നയങ്ങളോടും ട്വിറ്ററിലെ പുതിയ തൊഴിൽ അന്തരീക്ഷത്തോടും ഉള്ള അതൃപ്തി ഉപയോക്താക്കൾ രേഖപ്പെടുത്തിയത്.
