കിണറ്റില്‍ വീണ ലീഗല്‍ മെട്രോളജി വകുപ്പ് ഉദ്യോഗസ്ഥൻ മുങ്ങി മരിച്ചു. ഇദ്ദേഹത്തെ രക്ഷപ്പെടുത്താൻ കിണറ്റില്‍ ഇറങ്ങിയ അനുജൻ കിണറില്‍ കുടുങ്ങിയെങ്കിലും നാട്ടുകാർ രക്ഷപ്പെടുത്തി. കാസർകോട് ലീഗല്‍ മെട്രോളജി വകുപ്പ് ഉദ്യോഗസ്ഥനും കുമ്പള നായ്ക്കാപ്പ് നാരായണ മംഗലത്തെ താമസക്കാരനുമായ വിവേക് (32) ആണ് മരിച്ചത്.
ജ്യേഷ്ഠൻ കിണറില്‍ വീണത് കണ്ട അനുജൻ തേജസ്, സമീപത്തുണ്ടായിരുന്ന കയർ എടുത്ത് കിണറിലേക്ക് രക്ഷപ്പെടുത്താൻ ഇറങ്ങുകയായിരുന്നു.
ഇതിനിടയില്‍, കിണറില്‍ കുടുങ്ങിയ തേജസിനെ നാട്ടുകാർ എത്തി കയർ ഉപയോഗിച്ച് രക്ഷപ്പെടുത്തി. ഇതിന്റെ ഫലമായി, തേജസിന് കാര്യമായ പരിക്കേല്‍ക്കാതെ പുറത്തെത്താൻ സാധിച്ചു. വിവേകിനെ കിണറില്‍ നിന്ന് പുറത്തെടുക്കാൻ ശ്രമിച്ചെങ്കിലും പരാജയപ്പെടുകയായിരുന്നു.
പിന്നീട്, ഉപ്പളയില്‍ നിന്നെത്തിയ അഗ്‌നിരക്ഷാ സേനയാണ് വിവേകിന്റെ മൃതദേഹം കിണറ്റില്‍ നിന്ന് പുറത്തെടുത്തത്.
