ചെന്നൈയിൻ എഫ്സിയെ തകർത്ത് കേരളാ ബ്ലാസ്റ്റേഴ്സ് സീസണിലെ പത്താം ജയം സ്വന്തമാക്കി. രണ്ടാം മിനിറ്റിൽ അബ്ദുനാസർ എൽ ഖയാത്തി ചെന്നൈയിനായി ഗോൾ നേടിയപ്പോൾ അഡ്രിയൻ ലൂണാ, മലയാളി താരം രാഹുൽ കെ.പി എന്നിവർ ബ്ലാസ്റ്റേഴ്സിനായി വല കുലുക്കി. ആദ്യ ഗോളടിച്ചും രണ്ടാം ഗോളിന് വഴിയൊരുക്കിയും കളം നിറഞ്ഞ അഡ്രിയൻ ലൂണയാണു കളിയിലെ താരം. ചെന്നൈയിൻ്റെ തുടർച്ചയായ ആക്രമണങ്ങളത്രയും തടഞ്ഞ് ബ്ലാസ്റ്റേഴ്സ് ഗോളി പ്രഭ്സുഖൻ ഗില്ലും തിളങ്ങി.ഈ വിജയത്തോടെ ബ്ലാസ്റ്റേഴ്സ് പ്ലേ ഓഫ് സാധ്യതകൾ സജീവമാക്കി. നിലവിൽ 17 മത്സരങ്ങളിൽ നിന്ന് 31 പോയിൻ്റുമായി ബ്ലാസ്റ്റേഴ്സ് പോയിൻ്റ് പട്ടികയിൽ മൂന്നാം സ്ഥാനത്ത് തുടരുന്നു.
