കൊച്ചി:ഹര്ത്താലിനിടെ ഉണ്ടായ നാശനഷ്ടങ്ങളുടെ പേരില് കെഎസ്ആര്ടിസിയും സര്ക്കാരും ആവശ്യപ്പെട്ട നഷ്ടപരിഹാരമായ 5 കോടി 20 ലക്ഷം രൂപ കോടതിയില് കെട്ടിവയ്ക്കാന് ഡിവിഷന് ബെഞ്ച് നിര്ദേശിച്ചു. എതിര്കക്ഷികളായ പോപ്പുലര് ഫ്രണ്ടും പിഎഫ്ഐ സംസ്ഥാന സെക്രട്ടറി അബ്ദുള് സത്താറുമാണ് ഈ തുക കെട്ടിവയ്ക്കേണ്ടത്. രണ്ടാഴ്ചയ്ക്കകം തുക കെട്ടിവയ്ക്കണമെന്നും ഡിവിഷന് ബെഞ്ച് ഉത്തരവിട്ടു. തുക കെട്ടി വച്ചില്ലെങ്കില് റവന്യൂ റിക്കവറി ആക്ട് അനുസരിച്ചുള്ള തുടര്നടപടികള് സ്വീകരിക്കണമെന്നും ഹൈക്കോടതി നിര്ദേശിച്ചിട്ടുണ്ട്. അര്ഹരായവര്ക്ക് പണം നല്കാന് ക്ലെയിംസ് കമ്മീഷണറേയും ഹൈക്കോടതി നിശ്ചയിച്ചു. അഡ്വ. പി.ഡി.ശാര്ങധരന് ആണ് ക്ലെയിംസ് കമ്മീഷണര്.
ആഭ്യന്തര വകുപ്പ് അഡീഷനല് ചീഫ് സെക്രട്ടറി മുന്പാകെയാണ് തുക കെട്ടി വയ്ക്കേണ്ടത്. ഇങ്ങനെ കെട്ടിവയ്ക്കുന്ന തുക ക്ലെയിംസ് കമ്മീഷണര് മുഖേന വിതരണം ചെയ്യും. സര്ക്കാരും കെഎസ്ആര്ടിസിയും നല്കിയ കണക്ക് പ്രകാരമാണ് കോടതി തുക നിശ്ചയിച്ചത്. നഷ്ടം ഇതിലധികമാണെങ്കില് ആ തുകയും ക്ലെയിംസ് കമ്മീഷണര്ക്ക് മുന്പാകെ കെട്ടിവയ്ക്കണമെന്ന് കോടതി ഉത്തരവിട്ടു.