വഴിതെറ്റിയ നായകന്മാരെ വിരട്ടി നേര്വഴിക്ക് നയിക്കാന് ഇനി ആ വികാരി അച്ചനില്ല .. കോട്ടയം കുഞ്ഞച്ചനില് മമ്മൂട്ടി അവതരിപ്പിച്ച നായക കഥാപാത്രത്തെ എത്രെയെങ്കിലും തവണ ശാസിക്കുന്ന വികാരി അച്ചനായി വെള്ളിത്തിരയില് തിളങ്ങിയ നടന് ഡി ഫിലിപ്പ് കഴിഞ്ഞ ദിവസം അന്തരിച്ചു. 79 വയസായിരുന്നു. നന്നെ ചെറുപ്പത്തില് പി ജെ ആന്റണിയുടെ ശിഷ്യനായിട്ടാണ് ഡി ഫിലിപ്പ് അഭിനയ രംഗത്ത് എത്തുന്നത്. പിജെ ആന്റണിയുടെ നാടക പരീക്ഷണ ശാലയില് ആയിരിക്കുമ്പോള് നാഷ്ണല് തിയറ്ററില് അഭിനയിച്ചു. പിന്നീട് കെ പി എ സി , ചങ്ങനാശ്ശേരി ഗീത, കൊല്ലം കാളിദാസ കലാകേന്ദ്രം എന്നിങ്ങനെയുള്ള നാടക സമിതികളിലും ഡി ഫിലിപ്പ് സജീവമായി.
തട്ടകം ഗള്ഫിലേക്ക് മാറിയപ്പോള് അവിടെയും കലാപ്രവര്ത്തനങ്ങള്ക്കും നാടകത്തിനും ഡി ഫിലിപ്പ് സമയം കണ്ടെത്തി. പ്രവാസ കലത്താണ് കെ ജി ജോര്ജ് സംവിധാനം ചെയ്ത് നടന് തിലകലും മേനകയും വേണുനാഗവള്ളിയുമൊക്കെ അഭിനയിച്ച കോലങ്ങള് ( 1981) എന്ന ചിത്രം ഡി ഫിലിപ്പ് നിര്മ്മിച്ചത്.
പ്രവാസത്തിനുശേഷമാണ് കൊല്ലം കാളിദാസ കലാകേന്ദ്രത്തില് ഡി ഫിലിപ്പ് നടനായി എത്തുന്നത്. തുടര്ന്ന് വളര്ച്ചയുടെ പടവുകള് അദ്ദേഹം സ്വന്തമാക്കി. കാളിദാസ കലാകേന്ദ്രത്തിന്റെ റെയിന് ബോ എന്ന നാടകത്തിലെ അഭിനയത്തിന് 1986 ല് സംസ്ഥാന പുരസ്കാരം നേടി, സതി ,കടല്പ്പാലം, സ്വന്തം ലേഖകന് എന്നീ നാടകങ്ങളിലും കാളിദാസ കലാകേന്ദ്രത്തിനൊപ്പം ഡി ഫിലിപ്പ് പ്രവര്ത്തിച്ചു. ആലുവ രംഗഭൂമി, ( തിലകന് അധ്യക്ഷനായിരുന്ന നാടക സമിതി) തിരുവനന്തപുരം സൗപര്ണിക തിയേറ്റേഴ്സ് എന്നി സമിതികളും നാടകങ്ങളുടെ ഭാഗമായി.
ടെലിവിഷന് പ്രചുരപ്രാചാരം നേടിയതോടെ സീരിയല് രംഗത്തേ കളം മാറ്റി ചവിട്ടിയ ഡി ഫിലിപ്പ് അവിടെയും ഹിറ്റുകളുടെ ഭാഗമായി. സ്ത്രീ, മാളൂട്ടി, സ്വാമി അയ്യപ്പന്, ക്രൈം ആന്റ് പണിഷ്മെന്റ്, വാവ, കടമറ്റത്ത് കത്തനാര് എന്നിങ്ങനെ പ്രമുഖമായ സീരിയലുകളില് വേഷമിട്ട ഡി ഫിലിപ്പ്, ഒരുകാലത്ത് മലയാള സിനിമയ്ക്കും പ്രത്യേകിച്ച് മമ്മൂട്ടി സിനിമയ്ക്കും മാറ്റി നിറുത്താന് കഴിയാത്ത നടനായിരുന്നു.
മമ്മൂട്ടിയ്ക്കൊപ്പം അര്ഥം ,കോട്ടയം കുഞ്ഞച്ചന്,സ്റ്റാലിന് ശിവദാസ്,ടൈം, വെട്ടം, പഴശ്ശിരാജ,ഒന്നാമന്.എഴുപുന്നത്തരകന് എന്നീ ചിത്രങ്ങളിലും ഡി ഫിലിപ്പ് അഭിനയിച്ചു.
ഡി ഫിലിപ്പിന്റെ മരണത്തില് വിദ്യാഭ്യാസ മന്ത്രി ശ്രി വി ശിവന്കുട്ടി. കൊല്ലം എം എല് എ ശ്രീ മുകേഷ് എന്നിവര് അനുശോചനം രേഖപ്പെടുത്തി. സംസ്കാരം രണ്ട് ദിവസം കഴിഞ്ഞ് നടക്കുമെന്ന് ബന്ധുക്കള് പറഞ്ഞു.