തൃശ്ശൂർ : ഡ്രൈവിങ് സ്കൂള് ഇൻസ്ട്രക്ടർമാരില്‍ നിന്ന് കൈക്കൂലി വാങ്ങിയെന്ന പരാതിയില്‍ തൃശ്ശൂർ റീജിയണല്‍ ട്രാൻസ്പോർട്ട് ഓഫീസിലെ (ആർടിഒ) രണ്ട് മോട്ടോർ വെഹിക്കിള്‍ ഇൻസ്പെക്ടർമാരെ സസ്പെൻഡ് ചെയ്തു. അനീഷ് കെ.ജി., കൃഷ്ണകുമാർ എ.പി. എന്നിവർക്കെതിരെയാണ് നടപടി.
ഏജന്റുമാർ വഴി ഇവർ ഡ്രൈവിങ് ഇൻസ്ട്രക്ടർമാരില്‍ നിന്ന് കൈക്കൂലി വാങ്ങുന്നുണ്ടെന്ന് വിജിലൻസിന് രഹസ്യവിവരം ലഭിച്ചിരുന്നു. തുടർന്ന് ഏപ്രില്‍ 30-ന് വിജിലൻസ് നടത്തിയ മിന്നല്‍ പരിശോധനയിലാണ് ഇരുവരുടെയും പക്കല്‍ നിന്ന് കണക്കില്‍പ്പെടാത്ത പണം പിടിച്ചെടുത്തത്. ഇൻസ്പെക്ടർമാരില്‍ നിന്ന് 79,500 രൂപയാണ് പിടിച്ചെടുത്തത്. വിജിലൻസ് സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് ഇപ്പോള്‍ ഇവർക്കെതിരെ സസ്പെൻഷൻ നടപടി സ്വീകരിച്ചിരിക്കുന്നത്. സംഭവത്തെക്കുറിച്ച്‌ കൂടുതല്‍ അന്വേഷണം നടന്നുവരികയാണ്.
