തിരുവനന്തപുരം: പഴമയുടെ മാധുര്യവും ഓർമ്മകളുടെ ചൂടും വീണ്ടും ജീവനോടെ അനുഭവിപ്പിച്ച് കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ (കെഎസ്ആർടിസി) വിന്റേജ് മോഡൽ ബസ് സർവീസ് ആരംഭിച്ചു. ഒരുകാലത്ത് കേരളത്തിലെ നഗരവീഥികളിൽ ആധിപത്യം പുലർത്തിയിരുന്ന 1960-70 കാലഘട്ടത്തിലെ ബസുകളുടെ രൂപഭാവം അനുസ്മരിപ്പിക്കുന്ന രീതിയിലാണ് പുതിയ ബസ് രൂപകൽപ്പന ചെയ്തിരിക്കുന്നത്.
1965 മോഡൽ ബസുകളുടെ റെട്രോ ഡിസൈൻ അനുസരിച്ചുള്ള ബോഡി വർക്കാണ് ബസിന്റെ പ്രധാന പ്രത്യേകത. പഴമയുടെ ശീലുകളും ക്ലാസിക് വിൻഡോ സീറ്റുകളും ഓർമ്മിപ്പിക്കുന്ന ഈ വിന്റേജ് ബസ് ആധുനിക സൗകര്യങ്ങളോടെയാണ് നിരത്തിലിറക്കിയത്.
49 യാത്രക്കാർക്ക് യാത്ര ചെയ്യാനാകുന്ന (49+2) ശേഷിയുള്ള ബസ് പ്രധാനമായും ടൂറിസം പ്രോത്സാഹനത്തിന്റെ ഭാഗമായി നഗരകാഴ്ചകൾ കാണുന്നതിനുള്ള സർവീസുകൾക്കായാണ് ഉപയോഗിക്കുക.
ഇപ്പോൾ തിരുവനന്തപുരം നഗരത്തിലെ പേരൂർക്കട–കവടിയാർ–കിഴക്കേകോട്ട റൂട്ടിലാണ് ബസ് സർവീസ് നടത്തുന്നത്. കേരളത്തിന്റെ ടൂറിസം മേഖലയ്ക്ക് പുതുമയും നൊസ്റ്റാൾജിയയും ചേർത്ത ഒരു അനുഭവമായി ഈ വിന്റേജ് ബസ് മാറുമെന്ന് അധികൃതർ പ്രതീക്ഷിക്കുന്നു.
പഴമയുടെ ഓർമ്മകൾ നിറഞ്ഞ 'ആനവണ്ടി' വീണ്ടും നഗരവീഥികളിലൂടെ സഞ്ചരിക്കുമ്പോൾ യാത്രക്കാർക്ക് ഒരു നൊസ്റ്റാൾജിക് യാത്രാനുഭവം സമ്മാനിക്കുകയാണ് കെഎസ്ആർടിസി.
