കേന്ദ്ര ആഭ്യന്തര മന്ത്രാലയവും ഇന്ത്യൻ സൈബർ ക്രൈം കോർഡിനേഷൻ സെന്‍ററും (I4C) പുതിയൊരു തട്ടിപ്പിനെതിരെ മുന്നറിയിപ്പ് നല്‍കിയിരിക്കുന്നു. ഇ-സിം കാർഡ് ആക്ടിവേഷൻ എന്ന പേരില്‍ രാജ്യവ്യാപകമായി നടക്കുന്ന ഈ തട്ടിപ്പില്‍, വെറും മൊബൈല്‍ നമ്പർ ഉപയോഗിച്ച് ആളുകളുടെ ബാങ്ക് അക്കൗണ്ടുകള്‍ കാലിയാക്കപ്പെടുന്നു.
തട്ടിപ്പ് എങ്ങനെ നടക്കുന്നു?
സൈബർ തട്ടിപ്പുകാർ ടെലികോം സേവനദാതാക്കളുടെ കസ്റ്റമർ കെയർ പ്രതിനിധികളായി ചമഞ്ഞ് ഇരകളെ ഫോണില്‍ വിളിക്കുന്നു. വിവിധ കാരണങ്ങള്‍ പറഞ്ഞ് ഇ-സിം കാർഡ് എടുക്കാൻ ഇരയെ പ്രേരിപ്പിക്കും. തുടർന്ന്, തട്ടിപ്പുകാർ ആവശ്യപ്പെടുന്നതനുസരിച്ച്‌ ഇര 'ഇ-സിം ആക്ടിവേഷൻ റിക്വസ്റ്റ്' നല്‍കുന്നു.
ഈ അപേക്ഷ സ്വീകരിക്കപ്പെടുന്നതോടെ, ഇരയുടെ യഥാർത്ഥ സിം കാർഡിന്റെ നെറ്റ്‌വർക്ക് നഷ്ടമാകുന്നു. അതോടൊപ്പം, തട്ടിപ്പുകാരുടെ കൈവശമുള്ള ഇ-സിം പ്രവർത്തനക്ഷമമാകുകയും ചെയ്യുന്നു.
ഇതോടെ, ഇരയുടെ എല്ലാ കോളുകളും, മെസ്സേജുകളും, ബാങ്കിംഗ് ഇടപാടുകള്‍ക്കുള്ള ഒടിപികളും തട്ടിപ്പുകാർക്ക് ലഭിക്കുന്നു. ഈ വിവരങ്ങള്‍ ഉപയോഗിച്ച് അക്കൗണ്ടില്‍ നിന്ന് പണം മുഴുവനായി അവർ പിൻവലിക്കുന്നു. സാധാരണക്കാർക്ക് എളുപ്പത്തില്‍ തിരിച്ചറിയാൻ കഴിയാത്തതും, വളരെ വേഗത്തില്‍ നടക്കുന്നതുമാണ് ഈ തട്ടിപ്പ്.
സൈബർ കെണിയില്‍ വീഴാതിരിക്കാൻ ശ്രദ്ധിക്കേണ്ട കാര്യങ്ങള്‍:
● അപരിചിത നമ്പറുകള്‍ ശ്രദ്ധിക്കുക: അപരിചിതമായ നമ്പറുകളില്‍ നിന്നുള്ള കോളുകളും മെസ്സേജുകളും ഒഴിവാക്കുക. എപ്പോഴും ഔദ്യോഗിക ഉറവിടങ്ങളില്‍ നിന്ന് ലഭിക്കുന്ന വിവരങ്ങള്‍ മാത്രം വിശ്വസിക്കുക.
● ലിങ്കുകള്‍ തുറക്കുമ്പോള്‍ സൂക്ഷിക്കുക: വിശ്വസനീയമല്ലാത്ത സ്രോതസ്സുകളില്‍ നിന്നുള്ള ലിങ്കുകളില്‍ ക്ലിക്ക് ചെയ്യരുത്. സംശയമുള്ള ലിങ്കുകള്‍ ഒഴിവാക്കുന്നതാണ് ഏറ്റവും ഉചിതം.
● നെറ്റ്‌വർക്ക് നഷ്ടമായാല്‍ ഉടനടി പ്രതികരിക്കുക: നിങ്ങളുടെ മൊബൈല്‍ നെറ്റ്‌വർക്ക് അപ്രതീക്ഷിതമായി നഷ്ടപ്പെട്ടാല്‍ ഉടൻ തന്നെ ബാങ്കിനെ ബന്ധപ്പെട്ട് അക്കൗണ്ടുകള്‍ സുരക്ഷിതമാണെന്ന് ഉറപ്പുവരുത്തുക. ഇത് ഒരുപക്ഷേ തട്ടിപ്പിന്റെ ആദ്യ സൂചനയാകാം.
● സമ്മർദ്ദത്തില്‍ വീഴരുത്: അടിയന്തരമായി പ്രതികരിക്കണം എന്ന തരത്തില്‍ തട്ടിപ്പുകാർ നിങ്ങളെ സമ്മർദ്ദത്തിലാക്കാൻ ശ്രമിക്കാം. അത്തരം കോളുകളോട് ശാന്തമായി പ്രതികരിക്കുക. ഒരു തീരുമാനമെടുക്കുന്നതിന് മുൻപ് കാര്യങ്ങള്‍ ഒന്നുകൂടി പരിശോധിച്ച്‌ ഉറപ്പുവരുത്തുക.
● അടിയന്തരമായി റിപ്പോർട്ട് ചെയ്യുക: നിങ്ങള്‍ ഇത്തരത്തിലുള്ള തട്ടിപ്പിന് ഇരയായാല്‍ എത്രയും വേഗം സൈബർ പോലീസിനെ അറിയിക്കണം. പരാതി നല്‍കാൻ www(dot)cybercrime(dot)gov(dot)in എന്ന വെബ്സൈറ്റ് സന്ദർശിക്കുകയോ അല്ലെങ്കില്‍ 1930 എന്ന ടോള്‍ ഫ്രീ നമ്പറിൽ വിളിക്കുകയോ ചെയ്യാം.
