2025ലെ പ്രഥമ ഇ-മലയാളി പുരസ്കാരം സാഹിത്യകാരൻ മേതിൽ രാധാകൃഷ്ണന്. ഒരു ലക്ഷം രൂപയും ഫലകവുമാണ് അവാർഡ്. ഒക്ടോബർ 19 ഞായറാഴ്ച വൈകിട്ട് മൂന്നിന് തൃശൂർ പ്രസ് ക്ലബ്ബിൽ നടക്കുന്ന ചടങ്ങിൽ, കാഷ് അവാർഡ് ചിന്തകനും എഴുത്തുകാരനുമായ കെ. വേണു മേതിലിനു സമ്മാനിക്കും. ഫലകം സാഹിത്യ അക്കാദമി ചെയർ മാൻ പ്രശസ്ത കവി കെ. സച്ചിദാനന്ദൻ കൈമാറും.
ശാസ്ത്രത്തെ സാഹിത്യത്തോട് അടുപ്പിച്ച കിടയറ്റ ലേഖനങ്ങളും നിർമിതബുദ്ധി മുഖ്യ വിഷയമാക്കി 1999-ൽ പ്രസിദ്ധീകരിച്ച 'ദൈവം, മനുഷ്യൻ, യന്ത്രം' എന്ന കൃതിയെ മുൻ നിർത്തിയാണ് പുരസ്കാരം നൽകുന്നത്.
കവി, കഥാകൃത്ത്, നോവലിസ്റ്റ് എന്നീ നിലകളിൽ മലയാള സാഹിത്യത്തിനു പുതിയ ഭാവുകത്വം നൽകിയ എഴുത്തുകാരനാണ് മേതിൽ രാധാകൃഷ്‌ണനെന്നും എഴുത്തിൽ മലയാളി എന്നും സ്നേഹത്തോടെ ഓർക്കേണ്ട അപൂർവ രചനകൾ മേതിലിനു മാത്രം സ്വന്തമാണെന്നും പുരസ്കാര സമിതി വിലയിരുത്തി.
