കോട്ടയം: കോട്ടയം-കുമരകം റൂട്ടിൽ നിയന്ത്രണം വിട്ട കാർ പാടശേഖരത്തെ വെള്ളക്കെട്ടിൽ വീണു. കാറിലുണ്ടായിരുന്ന കാരാപ്പുഴ നന്ദനം മനോഹരനെയും ഭാര്യയെയും നാട്ടുകാർ രക്ഷപ്പെടുത്തി. ഇവർക്കു പരിക്കില്ല.കോട്ടയം-കുമരകം റൂട്ടിൽ രണ്ടാം കലുങ്കിനു കിഴക്ക് ഭാഗത്തായിരുന്നു അപകടം നടന്നത്. കൊച്ചിയിലെ ആശുപത്രിയിൽ നിന്നു കാരാപ്പുഴയിലെ വീട്ടിലേക്കു മടങ്ങുകയായിരുന്നു ഇരുവരും. പാടത്ത് വെള്ളം കുറവായതിനാൽ കാർ താഴ്ന്ന് പോയില്ല. കാറിൻ്റെ മുകൾ ഭാഗം കാണാവുന്ന നിലയിലായിരുന്നു.കാർ എവിടെയും ഇടിക്കാതെ നേരെ പാടശേഖരത്തിൽ വീഴുകയായിരുന്നു. തുടർന്ന് ഓടിക്കൂടിയ നാട്ടുകാർ വെള്ളത്തിൽ ഇറങ്ങി കാറിൻ്റെ വാതിൽ തുറന്ന് ഇരുവരെയും രക്ഷപ്പെടുത്തുകയായിരുന്നു.
