ജാപ്പനീസ് നിര്മ്മാതാക്കളായ സുസുക്കി ഈ വര്ഷം ഒക്ടോബറില് പുതുതലമുറ ആള്ട്ടോയെ അവതരിപ്പിക്കാനുള്ള ഒരുക്കത്തിലാണ്. ജപ്പാന് ഉള്പ്പെടെയുള്ള രാജ്യാന്തര വിപണിയില് ആള്ട്ടോ പഴഞ്ചനായി തുടരുകയാണ്. 2014 -ലാണ് ഹാച്ച്ബാക്കിനെ സുസുക്കി ഏറ്റവുമൊടുവില് പുതുക്കിയത്. നിലവില് ഇന്ത്യയില് വില്ക്കുന്ന ആള്ട്ടോയും രാജ്യാന്തര വിപണിയിലുള്ള ആള്ട്ടോയും തമ്മില് വലിയ വ്യത്യാസമുണ്ട്. ഇന്ത്യന് റോഡ് സാഹചര്യങ്ങള് പരിഗണിച്ചാണ് ആള്ട്ടോയെ മാരുതി ഇവിടെ പുറത്തിറക്കുന്നത്. ഇക്കാരണത്താല് രാജ്യാന്തര പതിപ്പില് നിന്നും വേറിട്ട രൂപഭാവം ഇന്ത്യന് ആള്ട്ടോയ്ക്ക് ലഭിക്കുന്നു.
എന്തായാലും പുതിയ ആള്ട്ടോയ്ക്ക് HEARTECT അടിത്തറയായിരിക്കും സുസുക്കി കല്പ്പിക്കുക. ഇന്ത്യയില് വില്പ്പനയിലുള്ള ഒട്ടുമിക്ക മാരുതി കാറുകളും ഇന്ന് HEARTECT അടിത്തറയാണ് ഉപയോഗിക്കുന്നത്. കുറഞ്ഞ ഭാരമാണ് HEARTECT അടിത്തറയുടെ പ്രധാന സവിശേഷത. ഭാരം കുറവെങ്കിലും ദൃഢതയില് വിട്ടുവീഴ്ച്ച സംഭവിക്കില്ലെന്ന് സുസുക്കി പറയുന്നു. കൂടുതല് സ്പോര്ടി പരിവേഷം പുതുതലമുറ ആള്ട്ടോയ്ക്ക് പ്രതീക്ഷിക്കാം.