ഇന്റര്നെറ്റിലെ അസംഖ്യം ഉള്ളടക്കങ്ങളെ പരസ്പരം ബന്ധിപ്പിക്കുകയും അവ എളുപ്പം തിരഞ്ഞു കണ്ടുപിടിക്കാന് സാധിക്കും വിധം ക്രമീകരിക്കുകയും ചെയ്ത വേള്ഡ് വൈഡ് വെബ് എന്ന സാങ്കേതിക സംവിധാനത്തിന് ഇന്ന് 30 വയസ്. വേള്ഡ് വൈഡ് വെബിന്റെ പിറന്നാള് ആഘോഷമാക്കി ഗൂഗിള് പ്രത്യേകം ഡൂഡിള് അവതരിപ്പിച്ചിരിക്കുകയാണ്.
വേള്ഡ് വൈഡ് വെബിനെ ഇന്റര്നെറ്റിന്റെ തന്നെ മറ്റൊരു പേരായി കാണാറുണ്ടെങ്കിലും അവ രണ്ടും ഒന്നല്ല. വിവര കൈമാറ്റത്തിന് സഹായിക്കുന്ന ഇലക്ട്രോണിക് / കംപ്യൂട്ടര് സാങ്കേതിക സംവിധാനങ്ങളുടെ ശൃംഖലയാണ് ഇന്റര്നെറ്റ് എങ്കില്. ഇന്റര്നെറ്റിന്റെ സഹായത്തോടെ വിവിധ ഉള്ളടക്കങ്ങളെ, അത് അക്ഷരങ്ങളോ, ചിത്രങ്ങളോ, വീഡിയോകളോ എന്തുമാകട്ടെ നമുക്ക് ലഭ്യമാക്കിത്തരുന്ന വിവര ശൃംഖലയാണ് വേള്ഡ് വൈഡ് വെബ്. ഇന്റര്നെറ്റിലെ ഉള്ളടക്കങ്ങള്ക്ക് ഇന്റര്നെറ്റില് മേല്വിലാസം നല്കുന്നതും അവയെ പരസ്പരം ബന്ധിപ്പിക്കുന്നതും വേള്ഡ് വൈഡ് വെബിലെ ഹൈപ്പര് ലിങ്കുകളും യുണിഫോം റിസോഴ്സ് ഐഡന്റി ഫൈയര് അഥവാ യുആര്ഐകളുമാണ്.